راديو مباشر .. تحليل لجلسة تداول اليوم الاحد حول تراجع السوق

نرحب اليوم في راديو مباشر بالأستاذ/ حسام أبو شملة مدير إدارة البحوث بشركة عربية أون لين.
- أهلا بيك أستاذ حسام.
- أهلا بيك أهلا وسهلا.
- أستاذ حسام شهدت جلسة اليوم تراجع غير متوقع المؤشر بيغلق متراجع بنسبة 3.03% تحليل حضرتك إيه لتعاملات السوق خلال جلسة اليوم؟
- الأول بس علشان تبقى الصورة واضحة إحنا من حوالي شهر تقريبا من ساعة ما المؤشر ما كسر نقطة الـ10000 نقطه وديه كانت نقطه قياسية بيكسرها أول مرة في تاريخه زي النقط التاريخية اللى كان كسرها قبل كده بس كان متوقع نشوف بعض المقاومه عندها وبعض الهدوء لكن اللى حصل إن إحنا شوفنا صعود متتالي في وقت قصير للمؤشر لحد ما وصل لـ11035 نقطه وبالتالي كان من الأمر الطبيعي إنه يعمل تصحيح في أيام كنا بنشوف فيها الصعود بالـ2% وبالـ1.5% بصورة متلاحقة وسريعة لأداء المؤشر لكن النزول ده إحنا بقلنا فترة ما بنشوفش أي نزول بنشوف حركات تصحيحية صغيرة فطبيعي إن يحصل حركة تصحيح بمثل هذه القوة بعد الصعود المتتالي أو السريع لكن النقطه هي إن ما يكونش اللى إحنا فيه ده تراجع مستمر زي ما الأفراد متخوفين من إن يحدث مثلما حدث عام 2006 لكن الأمر بيختلف في ظروف اقتصادية مختلفة في أوضاع مختلفة في أداء شركات مختلف في تدفقات نقدية مختلفة كل ديه نقط أنا شايفها في صالح السوق بالإضافة إن عملية التراجع بتم بـ Volume قليل يعني بمعنى النزول القوي بدأ من يوم الأربعاء كان Volume قوي الخميس ابتدا يقل شويه كان حوالي مليار وثمانمائة مليون تقريبا أو مليار وسبعمائة يوم الأحد النهارده في حوالي مليار وربعمائه أقل من الرنج المعتاد وحتى لما بيجي السوق بيرتفع أو في أثناء التعاملات نفسها بيرتفع بنلاقي قوة الشراء بتزيد بيحصل تراجع بنلاقي قوة البيع بتضعف شويه فده معناه إن لازالت القوة الشرائية موجودة ولا زالت القوة البيعية لم تصل إلى التحكم في أداء السوق ككل ديه أول نقطه تاني نقطه المؤشر وتراجع المؤشر بيبقى بسبب الأسهم القائدة بالدرجة الأولى الأسهم الصغيرة الثانية لسه بتقاوم نسبيا عملية النزول كل ديه عوامل أعتقد إحنا أمر طبيعي نشوف نزول بعد الصعود المتتالي اللى شوفناه خلال الأيام الماضية.
- طيب هل هناك علاقه بين ما شاهدته جلسة اليوم من عمليات بيع من جانب المؤسسات والأجانب متزامنة مع تراجع البورصات العربية؟
- هو العلاقه بينا وبين البورصات العربية أنا أعتقد إن ده أمر انتهى من فترة هي الجزئية العلاقه بيننا وبين البورصات العالمية وأداء البورصات العالمية أداء البورصات العالمية بيأثر سلبيا على أو أداء الأجانب تحديدا بيأثر على أداء الأسهم القائدة Blue Chips الغير مقيده في GDR فبالتالي ده اللى بتأثر على المؤشر لكن أداء البورصات العربية أنا ما أعتقدش إن هو المؤثر الوحيد لكن هي ظروف تشابهت هما كمان كانوا بيطلعوا صعود متتالي من فترة فبالتالي كان طبيعي يحصل عندهم حركة تصحيح مفيش علاقة ربط نقدر نقول طالما السوق السعودي أو السوق الإماراتي طلع يبقى إحنا لازم نطلع نزل يبقى إحنا لازم ننزل العلاقه انتهت من زمان اللى كان متابع بقاله فتره كنا إحنا بنرتفع في فترة هما بينخفضوا أو العكس صحيح.
- طيب النهارده قادة أسهم أوراسكومات تراجعات السوق تحليل حضرتك إيه لأداء هذه الأسهم؟
- أعتقد ده برضه من الأمر الطبيعي إن هي بتقود المؤشر نتيجة لمبيعات الأجانب فيها نتيجة لتراجع البورصات العالمية نتيجة لعمليات جني أرباح بس في نقطه ناخدها في حسابنا إن الأجانب مهما باعوا هما لسه نقدر نقول نقطه في بحر بمعنى إن إحنا كنا بنشوف إن هما صافي مشتري كل شهر بأرقام كبيره جدا فميجيش علشان باعو ب200مليون 300 مليون أو بمليار حتى أقول ده كده الأجانب بيهربوا من مصر أو بيخرجوا أو ديه عمليات تصفية لأن هما كانوا صافي مشتري ليرجع ويحسب نشوف بقالهم أكثر من سنة صافي مشتري شهري بأد إيه هايلاقي إن قيمة الاستثمار بتاعهم كان كبيرة جدا يوم الخميس أعتقد إن مشتريات الأجانب كانت أعلى من مبيعاتهم فإن الأمر برضه ما يأخذش بمثل هذه الصورة أنا لسه شايف إن الصورة إيجابية مفيش مشكله عملية التصحيح دية أعتقد يعني خلال منتصف الأسبوع ممكن إن هي تخلص ونلاقي السوق بيلف ويرجع تاني.
- طيب برضه أخيرا شهد سهم مصر للأسواق الحرة ارتفاعات قياسية مع إعلان الشركة للتجزئة وزيادة رأس المال تقييم حضرتك إيه لهذا السهم وآداءه اليوم؟
- يعني سهم مصر للأسواق الحرة مش من الأسهم اللى عليها الإقبال الشديد من الأفراد لكن مع الخبر أعتقد ارتفع يعني مش محتل نسبه كبيرة من تنفيذات السوق الجزئية الثانية اللى لازم برضه نبص عليها إن مع كل حركة تصحيح لو نفتكر بيثار نفس المخاوف من ساعة السوق ما كسر 8000 نقطه وإحنا برضه نفس السيناريو كل ما يجي السوق عند جزئية تصحيح أو جني أرباح بعد صعود مستمر بنلاقي نفس السيناريو بيتكرر ما بين الأفراد هل السوق هاينهار هل السوق هايقع لكن أنا شايف إن الصورة مختلفة عن 2006 وبعيده كل البعد.
- شكرا جزيلا لحضرتك أستاذ/ حسام أبو شملة مدير إدارة البحوث بشركة عربية أون لين.
- شكرا.