راديو مباشر : تحليل أداء السوق خلال جلسة اليوم

نرحب اليوم في راديو مباشر بالأستاذ/ محمد رضوان مدير المبيعات بشركة فاروس
لتداول الأوراق المالية.
- أهلا بيك أستاذ محمد.
- أهلا بيك يا فندم.
-
أستاذ محمد حالة من التقلبات شهدها السوق المصري اليوم ليختم الصراع عند مستوى
10013 تقييم حضرتك إيه لأداء السوق خلال تعاملات اليوم.
- هو زي ما حضرتك بتقول
في حركة تذبذب عنيفة جدا موجوده في السوق بمعنى إن مؤشر كاس 30 الـ2.5% أو الـ2.25%
اللى طلعهم امبارح النهارده فقدهم بسهولة جدا وبقينا نكلم دالوقت إن الحركة مش أقل
من 1% ديه الحركة خصوصا بعد تقلبات بتاعة الأسبوع اللى فات الحركة بقيت 2 و3 ويمكن
حصلت نزول بـ4 وحصل بعد كده طلوع بـ5% يعني دالوقت المؤشر بقى يتحرك جامد قوي خصوصا
الورق الكبير خاصة البنك التجاري الدولي وأوراسكوم للإنشاء والصناعة وأوراسكوم
تليكوم والمصرية للاتصالات بيبقى عندهم تأثر بالأسواق الأجنبية أكثر نتيجة
للمستثمرين الأجانب اللى موجودين الحركة موجوده في أسواق المال العالمية كلها حركة
التذبذب والناس زي ما تقول كده فاقده شوية تركيز أو فاقده الرؤية المستقبلية هل
الأسواق طالعه فيخشوا يشتروا فبالتالي يبقى اتجاه صعودي أو الأسواق نازله فيخشوا
يبيعوا فيبقى اتجاه هبوطي.
- طيب الأسهم القيادة خاصة الأوراسكومات ومبيعات
الأجانب أفقدوا المؤشر 1.96% خلال بداية التعاملات تعليق حضرتك إيه على هذه
الجزئية؟
- لازم المستثمر يفكر في فرق التوقيت فاحنا لازم نشوف إن امريكا بتشتغل
وبعد كده أمريكا بتقفل بيحصل بعد كده الأسواق الأسيوية وبعد الأسواق الأسيوية
الأسواق الخليجية بعد كده وبعد كده أسواقنا احنا وبعدينا أسواق أوربا نوعا ما يمكن
أسواق أوربا بتفتح قبلينا في الوقت لكن بيفتحوا بدري عننا لازم الناس تبص لفرق
التوقيت فلو جينا امبارح نبص نلاقي إن إحنا طلعنا 2% الناس بصت على الـ GDR طلع يوم
الجمعه إيجابي جدا لكن ما بصتش إن أسواق أوربا قفلت سلبي وديه أسواق بتقفل بعد
أقفال جلسة الـGDR فلو كانت عملت في حسابها الكلام ده كانت باعت امبارح بدل ما كانت
اشترت والنهارده كانت اشترت بأسعار أقل والناس اللى صحيت النهارده بصت لقت الأسواق
الآسيوية كلها بطريقه سلبية جدا قفلت امبارح بطريقة سلبية وأوربا برضه النهارده
تعبانه واحنا هانقول لنفسنا إن إحنا ساعات بنفصل نفسنا وساعات بنربط نفسنا لكن ديه
حقيقه لازم نقول إن سبب من اسباب النزول إن احنا مرتبطين عالميا بحالة الركود اللى
ناس متوقعها بالسوق الأمريكي أو الاقتصاد الامريكي والاقتصاد الياباني في الفترة
دية.
- طيب أستاذ محمد حجم التداول ما وصلش اليوم لنفس الحجم اللى كان عليه في
موجة الهبوط اللى شهدها السوق الأسبوع الماضي هل ده ممكن يعد مؤشر على حالة السوق
قريبا؟
- زي ما حضرتك ما بتقول السوق نازل النهارده وحجم التداول مليار و300 ديه
حاجه بنقول إن حجم البيع قل شويه لكن امبارح برضه والسوق طالع 2% حجم التداول كان
يدوبك مليار جنيه فيمكن امبارح كان أقل تداول له من بداية السنه يعني فعاوز الناس
إن هي تفكر نوعا ما ان السوق حاليا هو سوق مش مضارب لكن سوق Trading أو سوق طلوع
وخروج سريع نتيجة إن عدم وجود رؤية واضحة للأسواق العالمية والسوق بتاعنا بالأخص
بالنسبة للمسثمر المحلي هو ده اللى هايخلي الناس تشتري في أي فرص نزول عنيفة وتبيع
في أي فرص طلوع أو صعود يعني في الأسهم فبالتالي يقدر يحافظ على المستويات بتاعته
وخصوصا كمان إن حصل هزة عنيفة الأسبوع اللى فات فالأسعار اللى وصلت الاسبوع اللى
فات ما تحققتش تاني كأسعار متدنية يعني فالناس المفروض تبقى عارفه إن في هزه حصلت
في الأسهم فبالتالي ممكن تحصل تاني.
- في ظل هبوط المؤشر اخترقت القابضة
الكويتية أعلى سعر ليها منذ سنة وتسعة أشهر ومحققا 2.83 دولار للسهم بارتفاع 1.8%
في تفسير عند حضرتك لهذا؟
- هو بصراحه سهم القابضة الكويتية بيشد جامد قوي من
خلال الأسبوع اللى فات وطلع حافظ شويه على مستوياته 2.60 دولار وبعده كده اخترق
2.70 وراح لـ2.80 هو طلع 1.5% أكيد في حاجه بتحصل داخل الشركة معلومة معينة للاسف
الشديد القوة الشرائية الموجودة دية اللي هي 5 مليون سهم يدوبك خامس شركة من حجم
التداول لكن المعلومة دية مش واضحه لبقية المتعاملين في السوق فأرجوا إن القابضة
الكويتية مش عايز أقول إشاعات وكده لكن هي لازم تدي توضيح نتيجة إن صعب قوي إن تكون
الحالة العامة للسوق بهذا الشكل سلبية ونلاقي سهم واحد هو اللى بيتخترق زي ما حضرتك
بتقول توقعاته وبيطلع فأكيد في خبر إيجابي موجود بس لسه مش متاح لبقية المتعاملين
في السوق.
- طيب رؤية حضرتك إيه لأداء وتوقعاتك إيه للفترة القادمة بالنسبة لسهم
طلعت مصطفى اللى انخفض اليوم تحت مستوى 12 جنيه؟
- أنا شايف إن سهم طلعت مصطفى
يستاهل إن الواحد يشتريه مش عايز أقول يعني في السعر يعني اشتري عند أي سعر لكن بنك
HSBC وده بنك مرموق جدا وبنك له قبل كده بيعمل COVERAGE على الأسهم المصرية إيجابي
جدا عمل تقييم عليه فوق الـ16 جنيه وكان هو المشتري الرئيسي من خلال شركة السمسرة
بتاعته على 12 جنيه فأنا شايف إن أي فرصة في خلال الـ11.60 الـ11.5 هاتبقى فرصه
إيجابية إن الواحد يخش يشتري وخصوصا كمان إن هو ما طلعتش زي بقيت السوق وإن هو كمان
بما إن هو نزل طرح خاص كل الناس قبل كده شافت اللى حصل في غبور والسويدي وعرفه
والعائد اللى حققه طروح الشركات الخاصة على المستثمر اللى دخل في بدايتها وبيتهيئ
لي إن هايكون سهم إيجابي للشراء وبنصح الناس الشراء فيه لو وصل لأسعار متدنية عن
كده.
- طيب بالنسبة لسهم الكابلات الكهربائية هو كان من الأسهم اللى شهدت أكبر
حجم تداولات النهارده تقييم حضرتك إيه لأداءه برضه؟
- برضه أن بكلم على سهم سعره
1.70 جنيه النهارده عمل 10 مليون جنيه فعمل 17 مليون جنيه يعني يدوبك حاجه بسيطه
قوي بالنسبة كجزء من حجم تداول الأسهم الكبيرة فديه الأسهم اللى دائما الأفراد
بيخشوا فيها لما بيحصل نوع من أنواع التخبط نوعا ما في الرؤية في السوق دائما
بنلاقي الناس بتهجم على الأسهم اللى هي ذات سعر صغير أو متوسطة الحجم خصوصا في قطاع
الغزل والنسيج وقطاع الإسكان وكده فمنها الكابلات برضه الناس بتخش بتتكالب عليه
بتشوف إن هو ممكن يحصل عليه نوع من أنواع المضاربة إن هي الناس بتهرب من الورق
الكبير وتخش في الورق الصغير نتيجة إن الورق الكبيرة بيبقى هو ده اللى له تأثير
سلبي على المؤشر بيبقى هو دائما المتعلق بالمؤسسات يقولك أن اخش اطلع بفلوسي وأخش
على الورق الصغير اللى هو ممكن ما يكنش له تأثير سلبي ما تقلبات السوق.
-طيب
بولفارا نفذ عدد كبير من الصفقات رغم تراجعها بنسبة33% تفسير حضرتك إيه؟
-إحنا
رأينا على التحليل الفني الداخلي للشركة إن في قطاعات معينة هاتبقى أداءها جيد في
2008 من القطاعات دية هو قطاع الغزل والنسيج إلى جانب بعض الشركات الأخرى اللى هما
خلال سنه ونصف محققوش الطفرة اللى المفروض كانوا يشوفها مقارنة ببقية السوق ده
تقريبا من شهر 3 /2006 يعني الـ9 أشهر بتاعة 2006وسنة 2007 الحاجات دية يعني مثال
العربية لحليج الأقطان واقفه على 9 جنيه ما اتحركتش أو شافت طفرات قليله قوي فإحنا
شايفين إن 2008 قطاع الغزل والنسيج بناء على تحليل فني بحت مش بناء على أسواق مالية
أو حاجه ممكن يكون أحسن أداء من بقية القطاعات اللى موجوده في البورصة.
- شكرا
جزيلا لحضرتك أستاذ/ محمد رضوان مدير المبيعات بشركة فاروس لتداول الأوراق
المالية.
-شكرا يا فندم.