راديو مباشر : تحليل لأداء السوق خلال جلسة اليوم

نرحب اليوم في راديو مباشر بالأستاذ/ محمد فؤاد المدير التنفيذي بشركة جلوبال كابيتال لتداول الأوراق المالية.
- أهلا بيك أستاذ محمد.
- أهلا بيك يا فندم.
- أستاذ محمد شهد المؤشر خلال منتصف اليوم حالة من التذبذب بين الصعود والهبوط أغلق مسجلا مستوى 10501 من هنا تحليل حضرتك إيه للتعاملات من خلال متابعتك لجلسة اليوم؟
- والله هو كان وضع طبيعي إن منطقة الـ10500 أو رقم 10500 يعتبر نقطة مقاومة فكان طبيعي إن يبقى فيها جزء من التردد تخطيها ما يتخطاش بسهولة اللى إحنا كنا متوقعيناها أو الناس كانت شايفه إنها ممكن تحصل لكان وضع طبيعي إن الناس عند مستوى 10500 تبدأ تخرج شويه أو تحسن الـ Position بتاعتها وده اللى كان موجود في بداية الجلسة بعد كده حصل نوع من أنواع الشراء القوي على نفس الأرقام في حتة الـ10500 نقطه وقدر المؤشر في النهاية يستقر عندها وأنا أعتقد إن هو في جلسة الغد هايكون متجاوب إن شاء الله ونقدر نقول إن إحنا كده نكاد نكون تجاوزنا الـ10500 نقطه.
- طيب تعليق حضرتك إيه على إن السوق بنلاحظ عليه خلال هذه الفترة إن معظم أسهمه بتشهد حالة من التحرك السريع Up and down ده بيأثر على قرار المستثمرين ؟
- والله هو التحرك السريع Up and down ده موجود في العالم كله في الفترة الأخيرة ويمكن من أكبر الفترات اللى عالم كله بيشهد فيها أو بورصات العالم كلها بتشهد فيها نوع من أنواع التداول السريع اللى بيتسم Volitality عالية أو بتحرك سريع Up and down ديه ظاهرة ظهرت في الفترة الأخيرة وأعتقد ان الكلام ده جي نتيجة نوع من أنواع التردد أو التضارب بين المستثمرين نتيجة إن بعض الأسواق تكاد تكون عالية الأخبار متضاربة Liquidity زادت قوي السيولة يعني زادت بصورة واضحة جدا والكلام ده أنا إلى نوع من أنواع الدخول والخروج السريع في بعض الأسواق منها السوق المصري مما أسفر عنه التردد السريع جدا برضه دخول بعض المستحدثات أو الحاجات الجديدة اللى داخله السوق عندنا زي البيع والشراء في داخل الجلسة على كمية من الأسهم كبيرة ده بيدل على أن الناس بقى عندها نوع من أنواع الرغبة في التداول السريع بيعا وشراء في ذات الجلسة والكلام ده خلق نوع من أنواع الثبات شوية في تحركات بحيث إن الناس تشتري السهم طلع طلوع مناسب اثنين ثلاثه أربعه في المائة ممكن يبيعه في نفس الجلسة الكلام ده خلا التردد ارتفاعا وهبوطا بقى في زيادة شويه ونتنيجة اتجاه الناس نفسها للبيع والشراء في نفس الجلسة.
- طيب أتحول مع حضرتك أستاذ محمد لسهم النساجون الشرقيون اللى بنجد أن السهم لم يتأثر بالرغم من إعلان هيرمس النهارده تحديد السعر المستهدف ليه عند 63.10 جنيه وكذلك شركة مترو اللى حددت القيمة العادلة له عند 73 جنيه تفسير حضرتك لده إيه؟
- والله هو سهم النساجون سهم كويس جدا فيه Fundamental جدا الجني بتاعته يساوى أن نقدر نقول فيه Fundamental جيد اللى بيحدث في الفترة الأخيرة في Market إلى حد ما كان ظهر عدد من أوردات بيع الأجانب فيه سهم النساجون أعتقد إن الـ Market استوعبها وأنا شايف إن هو في نقط جيده للشراء يساوي أكثر من كده كثيرا بدليل إن بعض الشركات منها المجموعة المالية وبعض شركات أخرى قيمته بأسعار أكثر من الأسعار الموجوده عنده حاليا فأنا شايف إن يعني يعتبر أسعار متدنية وأعتقد إن هو الفترة القادمة هايشهد نوع من أنواع التحرك لأعلى يعني نتيجة إن هو تحت القيمة العادلة ليه.
- طيب تم الموافقة على زيادة رأس مال شركة الحديد والصلب في رأيك تأثير ده إيه على أداء السهم الفتره الى جيه؟
- والله هو زيادة رأس مال الحديد والصلب أعتقد إن هو هايتجه بيها صعودا أو هايبقى له تأثير إيجابي على الشركة وده من وجهة نظري أنا لأن إمكانية زيادة رأس المال هاتسمح للشركة بتطوير قدرتها لزيادة إنتاجها وفي نفس الوقت هايبقى في اتجاه صعودي لأن الزيادة دية بالقيمة الأسمية 2 جنيه أعتقد فهايبقى فيه تحرك إيجابي على السهم بعد التعديل اللى تم النهارده من الجمعية العمومية الغير عادية.
- طيب أستاذ محمد رغم تضارب التصريحات بين شركتي مدينة نصر للإسكان والقطامية هايتس ما زال السهم بيواصل صعوده تفسير حضرتك لده إيه؟
- والله حضرتك أنا ذهلت لما قرأت في العالم اليوم إن شركة القطامية هايتس بتنفي وجود أي ديل أو اتفاق بينها وبين شركة مدينة نصر وديه كانت بالنسبة ليه مفاجئة بصراحه لأن المفروض إن هايبقى في أحداث كثير وجود صفقة مش ممكن مدينة نصر هاتقدر ترسل للبورصة خطاب بيقول فيه إن هي فعلا قامت بعقد أو في اتجاهه لعقد أو بتنهي التعاقد مع شركة القطامية هايتس على استغلال المنطقة المذكورة في الخبر اللى كان معلن يعني وفي نفس الوقت نلاقي تاني يوم الجماعه بتوع القطامية هايتس بيعلنوا إن مفيش أي اتفقا ده شيء غريب جدا ولغاية دالوقت أنا شايف إن هو عليه علامات استفهام وحتى الرد اللى بلغت بيه شركة مدنيةنصر البورصة أنا شايف إن هو رد غير كافي لأن المفروض يتدخل في الأمر للأسف هي القطامية هايتس ليس لها أسهم متداولة كان من الواجب إن إحنا نرجع لها كبورصة لو ليها اسهم متداولة بس هو أمر عليه علامات استفاهم كثيرة وأعتقد إن هو محير صعود السهم بيقول إن السهم فيه نمو الفترة القادمة أكثر من هذا من وجهة نظر المشتري بس أنا شايف إن تضارب الأقاويل حول حدوث الصفقة من عدمه يعني موضوع يستحق الحسم والجزم على اساس إن المستثمرين يبقوا على علم كافي بأن فيه فعلا خبر في السهم ولا مفيش لأن ده شيء مهم جدا وأعتقد أن الخبر ده بيبقى مأثر Volume للسهم نفسه ما ينفعش يبقى القطامية هايتس تنفي ومدينة نصر تؤكد والبورصة لا تملك صلاحية على الإطلاق على القطامية هايتس وبالتالي بترجع لمدينة نصر ومدينة نصر بتعلن إنها فعلا فيه تعاقد بيتم أو بينتهي علامات استفاهم كثيرة أعتقد إن الكلام ده محتاج تدخل البورصة والهيئة حتى نقدر نعلن للمستثمرين حقيقة الأمر من ناحية ومن ناحية ثانية حتى نسيطر ما يبقاش كل شركه عايزه تقول أخبار تطلع بيه بصورة أو بأخرى ويبقى الضحية في الآخر المستثمر.
- علشان يكون فيه مزيد من الشفافية ؟
- بالظبط يعني الإيضاح والشفافية أساس التعامل في الأوراق المالية
- طيب أستاذ محمد سهم الجيزة العامة للمقاولات شهد ارتفاعات ملحوظة اليوم والأمس بنسبة 20% دون إعلان أي أحداث جوهرية هل ده ممكن يكون له تفسير؟
- والله أنا أعتقد إن الأسهم المتداولة من إجمالي أسهم الجيزة عدد مش كتير وبالتالي هي من الأسهم اللى أحيانا بتدخل تحت قاعدة المضاربة فأنا حتى الآن ما اعتقدش إن فيه سبب جوهري لارتفاع سهم الجيزة غير خبر التقسيم القديم اللى كنا سمعنا عن موافقة الهيئة عليه ممكن يكون اقترب ميعاد التقسيم نفسه أو في أي بيانات وارده عنه في المستقبل القريب بس ما اعتقدش إن فيه أي أخبار جديده على سهم الجيزة للمقاولات.
- إنما تقييم حضرتك إيه لأداء السهم بشكل عام؟
- والله هو السهم يعتبر في اتجاه صعودي حتى الآن ما نزلش تحت الاتجاه الصعودي بيتماسك عند نقط المقاومة اللى بتحافظ على الصعود للسهم التجزئة طبعا هاتساعد إن السهم يبقى أكثر سيولة وأكثر تحرك وهاتزيد من الـ Liquidityوبالتالي قد تسمح بدخول أكثر لبعض المستثمرين اللى قد يكون من بعض نوعياتهم المؤسسات اللى بتحافظ دائما على إنها لما بتتجه لدخول سهم إن يكون في Liquidity كفايه سواء المؤسسات أو الأجانب بيكونوا حريصين على أن السهم يكون فيه Liquidity زيادة على أساس إن هما يقدروا يخرجوا ويدخلوا في السهم من غير ما يكون فيه صعوبه.
- شكرا جزيلا لحضرتك أستاذ/ محمد فؤاد المدير التنفيذي بشركة جلوبال كابيتال لتداول الأوراق المالية.
- شكرا.