راديو مباشر .. تحليل لاداء جلسة تداول اليوم الاثنين

ونرحب اليوم في راديو مباشر بالأستاذ/ وائل عنبة خبير أسواق المال
- أهلا بيك أستاذ وائل.
- أهلا بيك وأهلا براديو مباشر.
- أستاذ وائل شهدت جلسة اليوم أعلى نسبة تراجع خلال جلسة واحدة منذ عام ونصف وصلت إلى 9964 نقطه تحليل حضرتك إيه لهذا التراجع؟
- والله هو التحليل للتراجع ده أكبر من أي توقع لأي محلل كان بيتوقعه خلال الأسبوع الماضي إحنا كلنا كنا بنتوقع إن في جني أرباح هايحصل لكن جني الأرباح تم بصورة عنيفة في الحالة ديه ما بنقولش إن ده جني أرباح بنقول إن ده هبوط بعد اللى حصل النهارده وامبارح وأول امبارح حوالي 1000 نقطه فقدها المؤشر من مستوى 11 ألف لمستوى 9960 إلى إحنا عنده في مقولة بتقول إن لو عطست بورصة أمريكا العالم كله بيجي له برد ولكن واضح إن أمريكا عطست يوم الجمعه فالعالم كله جت له نزلة شعبية مش برد فقط –للدرجة دية- للدرجة دية لأن هبوط عام مش هبوط خاص بالبورصة المصرية الهبوط هنا في البورصة المصرية والبورصات العربية وبأرقام كبيرة وفي البورصات الأوربية فواضح إن هو تأثير السبب الرئيس اللى حصل في بورصة أمريكا يوم الخميس والجمعة النهارده البورصات في أمريكا مغلقة مش هاتشتغل النهارده وبالتالي إحنا هاننتظر لغاية ما بكره بورصة أمريكا نشوف إيه اللى هايحصل فيها فده سبب رئيسي إن الهبوط اللى حصل في البورصة المصرية بعوامل خارجية مش بعوامل داخلية إحنا ما زلنا هنا متوقعين إن في حالة صعود وإن في نتائج أعمال مبشرة لجميع الشركات وفي أداء اقتصادي عام كويس إحنا متوقعين عودة الموجة الصعودية مرة أخرى ديه أول نقطه النقطه الثانية كبار المضاربين دائما بيستغلوا الحالة النفسية السيئة للأفراد فبيحاولوا إن هم يضغطوا على بعض الأسهم علشان يرجعوا يشتروا بأسعار يعني أقل مما أي حد يتخيل ديه نقطه برضه أدت إلى هبوط السوق لكن الحاجة اللى أنا عايز أقولها لجميع المستثمرين موجات الصعود والهبوط ديه موجات مستمرة في جميع الأسواق عادة ما بنيجي في موجة الهبوط بناخد قرار انفعالي ونخرج من السوق بعدها بنندم وده حصل في مرات كثيرة جدا السنه اللى فاتت والسنة اللى قبلها إن في ناس كثيرة جدا خافت من موجة الهبوط وبدأت تخرج من السوق بعدها بيوم أو اثنين السوق لما ابتدا يرد بدأت الناس تندم إن هي خرجت من السوق وبترجع تكون مراكز شرائية بأسعار أغلى من الأسعار اللى خرجت بيها ولذلك النصيحة العامة للكل تحكم في قرارك اليومين دول ما تبقاش قرارك انفعالي وميبقاش قرارك سريع لأن القرار الإنفعالي دائما بينتج عنه أخطاء.
- لكن شايف حضرتك إن السوق بيمر بعملية تصحيح؟
- واضح إن هي إحنا هانقول هبوط مش تصحيح تصحيح معناها إن إحنا ارتفعنا أكثر مما يجب لأ هو اللى حصل إن كان في موجه صعودية والموجه ديه مستمره بقالها أكثر من سنة وكلنا متوقعين إنها تستمر وهاتكمل بس اللى حصل هبوط عنيف في بورصات خارجية أدى إلى هبوط البورصة المصرية في ثلاثة أيام حوالي 1000 نقطه لكن أنا بتوقع إن الموجة دية متهيئ لي إن هي وصلت للقاع عندنا وفي البورصات الخارجية كلها يعني ممكن من النقط دية يرجع البورصات الخارجية تلم واحنا كمان كبورصة مصرية أعتقد إنها هاترجع تلم تاني ويظهر حالة من الشراء وحالة من الصعود.
- شايف حضرتك إن الموقف ده جيه بصورة حادة مش بشكل تدريجي؟
- هي كانت بصورة حادة أكثر مما أي حد يتخيل يعني كلنا كنا متوقعين إن في Correction في حدود 400 نقطه من الـ11 ألف لغاية الـ10600 لكن يحصل Correction بصورة الكبيرة قوي دية حوالي 1000 نقطه في ثلاثة أيام أعتقد إن ديه كبيرة أكثر مما أي محلل كان بيتوقعها فكان حادة وعنيفة الصراحة.
- طيب رؤية حضرتك إيه لحجم التداول اليوم اللى تجاوز مليار ونص مليار جنيه مع هذه التراجعات اللى بيشهدها السوق هو إحنا كنا دائما بنقول لما بيحصل حالة هبوط مع حجم تداول قليل ده كان ظاهرة إيجابية لكن النهارده حالة الهبوط كبيرة جدا جدا مع حجم تداول أنا بعتبره المعتاد اللى هو مليار وثمانمائة اللى بنشوفه من أول السنه لغاية دالوقت بس بصراحه عدد النقط اللى فقدها المؤشر كانت عدد كبير جدا يعني حوالي 440 نقطه وده كان عدد كبير جدا سببه الرئيسي إن طبعا الأجانب بتشتغل على أسهم المؤشر الأسهم اللى لها أوزان فكان النهارده في موجة بيع للأجانب النهارده وامبارح يمكن ده هو اللى خلا إن الحالة الهبوطية كان كبيرة قوي قوي قوي على مستوى المؤشر لكن لو بصينا على مستوى الأسعار لأسهم ثانية بره المؤشر مهبطتش بنفس الدرجة اللى هبط فيها المؤشر 10000 نقطه في ثلاثة أيام.
- سهم OCI أستاذ وائل شهد حالة من التصحيح وصل لـ500 جنيه خلال منتصف الجلسة وارتد بعد كده ليغلق عند 546 تقييم حضرتك إيه لأداءه؟
- والله النهارده أن لو هاعلق على OCI هاعلق على بقية الأسهم اللى حصل فيها هبوط شديد مبالغ فيه برضه إحنا لقينا فرق سعر أوراسكوم للإنشاء والصناعة حوالي 50 جنيه أدنى سعر عملته 500 وبعد كده اشتغلت في 550 يعني حوالي 10% فده يبين أد إيه إن القرار الانفعالي كان خطأ للمستثمر اللى دخل باع بسعر 500 جنيه لأن بعد ما باع مفيش بتاع 10 دقائق السهم اشتغل بـ 10% أكثر مما باع فديه أول تحليل الحالة النفسية لما بتبقى متحكمه في المستثمرين بياخدوا قرارات انفعالية لكن السهم كأداء أداءه قوي في توزيعات هاتحصل الشهر اللى جي على السهم وصل لنقط إحنا بنعتبرها نقط دعم قوية جدا جدا كلنا بنتوقع إن النقط دية نقط ارتداد الحاجة الثانيه الحالة العامة لأي هبوط شديد بيتبعه صعود والعكس صحيح في حالة أي صعود شديد بيتبعه هبوط إحنا شايفين الهبوط شديد جدا سواء على مستوى الأسهم أو على مستوى المؤشر ممكن يتبعه حالة من الصعود بكره وبعده إن شاء الله.
- أستاذ وائل تفسير حضرتك إيه لقطاع النقل البحري اللى كاد يكون القطاع الوحيد اللى حقق ارتفاعات مع تراجعات السوق؟
- هو طبعا القطاع ده النهارده كان لافت لنظر جميع المتعاملين في السوق إن في حالة شديدة جدا للسوق المصري نلاقي سهم زي التوكيلات للقناة النهارده طالع حوالي 15% فده كان صعود كبير جدا إحنا لغاية دالوقت ما عندناش تفسير محدد ولكن هانفترض افترضين ياأما في مضاربين أقوياء بيتحكموا في هذا السهم وبيختلقوا عليه مجموعة من الإشاعات علشان يعرفوا يطلعوا بيه ياأما فعلا في حدث داخلي في هذا السهم ما حدش يعرفوا لكن شكل الشاشه بيقول إن فيها حدث داخلي لو في حدث داخلي أو عرض شراء لسهم من الأسهم في هذا القطاع يمكن تعدل الحالة النفسية للسوق ككل إن إحنا كلنا هانلاقي إن في عروض هاتيجي للسوق المصري هاتعدل الحالة النفسية ولكن مفيش مبرر للصعود المبالغ فيه إلا إذا كان في حاجة داخلية كلنا ما نعرفهاش عدا هذا الصراحة مفيش مبرر للصعود القوي جدا في ظل هبوط قوي في هذا السوق إلا إذا كان في حاجة داخلية لغاية دالوقت محدش يعرفها والشركة لم تفصح عنها وإن كان سابقا الشركة أفصحت إن مفيش أي أحداث جوهرية فإحنا منتظرين إن الشركة تبرر لينا حالة الصعود الكبيرة اللى بتحصل في سهم القناة للتوكيلات وطبعا بيأثر على بقيت القطاع الشحن والنقل البحري كله.
- شكرا جزيلا لحضرتك أستاذ/ وائل عنبة خبير أسواق المال لتعليقك على أداء السوق المصري في جلسة اليوم.
- شكرا جزيلا.